Euskal Katedraren jarduna eten egin dute Nafarroako Unibertsitatean

Otoitzak euskaraz

GURE AITA

Gure Aita,

zeruetan zarena,

santu izan bedi zure izena,

etor bedi zure erreinua,

egin bedi zure nahia

zeruan bezala lurrean ere,

emaiguzu gaur egunhonetako ogia,

barkatu gure zorrak

guk ere gure zordunei

barkatzen diegunez gero

ez gaitzazu utzi tentaldian erortzen

baina atera gaitzazu

gaitzetik. Amen.

AINTZA

Aintza Aitari eta Semeari eta Espiritu Santuari. Hasieran izan bezala, orain eta beti, gizaldi eta gizaldietan. Amen.

GURUTZEAREN SEINALEA

Gurutze Santuaren seinaleagatik

gure etsaiengandik libra gaitzazu,

gure Jaun eta Jainkoa.

Aitaren eta Semearen eta Espiritu Santuaren izenean. Amen.

AGUR MARIA

Agur Maria graziaz betea,

Jauna da zurekin,

bedeinkatua zera zu andre guztien artean

eta bedeinkatua da zure sabeleko fruitua Jesus.

Santa Maria Jaungoikoaren Ama

erregutu ezazu gu pekatarion alde

orain eta gure heriotzeko orduan.

Amen.

ANGELUSA

-Jainkoaren aingeruak adierazi zion Mariari.

-Eta Espiritu Santuaren egitez sortu zuen.

Agur Maria…

-Hona hemen Jaunaren mirabea.

-Gerta bekit zuk diozun bezala.

Agur Maria…

-Eta Jainkoaren Semea gizon egin zen.

-Eta gure artean bizi izan zen.

Agur Maria…

-Otoitz egizu gure alde Jainkoaren Ama done horrek.

-Jesu Kristoren aginduak irabaz ditzagun.

Egin dezagun otoitz:

Ixuri Jauna gure bihotzeta zure grazia,

aingeruak esanik Jesu Kristo zure Semea

gizon egin dela jakin dugunoi,

Haren nekaldi eta gurutzearen bidez

piztuerako aintzara iritsi gaitezen.

Jesu Kristo gure Jaunaren bitartez.

Amen.

Aintza Aitari…

SALBEA

Agur erregina, ama errukiorra,

gure bizi, gozo eta itxaropen, agur.

Zuri deiez gaude, Ebaren ume

zuri aiezka, antsiz eta negarrez, negar herri honetan, erbesteratuok,

ea bada, itzul itzazu gugana zure begi errukitsu horiek

eta erbeste honen ondoren erakus ezaiguzu Jesus zure sabeleko

fruitu bedeinkatua.

O bihotz bera, o errukior, o Maria Birjina gozoa!

Otoitz egizu gure alde, Jainkoaren ama done horrek

zure Seme Jesu Kristo gure Jaunaren aginduak irabaz ditzagun. Amen.

ESPIRITU SANTUARI

Zeru-lurren egile zeran Espíritu Santua

zatoz eta bete gure bihotzak,

piztu gugan maite sua.

AINGERU ZAINDARIARI

Aingeru zaindari, lagun on hori,

gau eta egun lagun niri.

Ez nazazu inoiz ni bakarrik utzi.

Nik zerurako nahi dut bizi.

EGUNA ESKAINTZEKO

Jesu Kristo nire Jauna, Mariaren bihotz garbiaren bitartez

zure Bihotzari ematen natzaio

eta Zurekin eskaintzen naiz Aitari aldareko sakrifizio santuan,

gaurko nire otoitzekin eta lanekin,

sufrimenduarekin eta pozekin,

mundua salbatzeko

eta zure erreinua gugana etor dadin.

ESKERRAK EMATEKO EGUNA BUKATZEAN

Gaur, egun osoan, eman didazu

zure laguntza eta maitasuna;

eman didazu biziaren poza ere.

Orain, lokartu aurretik, hauxe esaten dizut:

Eskerrik asko, Aita!

MAHAIA BEDEINKATZEKO

Bedeinka gaitzazu Jauna eta bedeinka itzazu zure ontasunetik hartu ditugun dohai hauek, Jesu Kristo gure Jaunaren bitartez. Amen.

DAMU OTOITZA

Jesu Kristo nire Jauna, Jainko eta gizon egiazko, nire Egile, Aita eta Salbatzaile hori. Zarena zarelako neurri gabe ona eta gauza guztiak baino maiteago zaitudalako damu dut bihotz bihotzez, damu dut zu nahigabetua. Eta infernuko oinazeetan zigortu nazakezulako. Zure Jainko graziaz lagunduta asmo sendoa hartzen dut berriz ere bekaturik ez egiteko, aitortu eta bekatuen ordaina betetzeko. Amen.

Arrosarioko litaniak

Erruki, Jauna.

Kristo, erruki.

Erruki, Jauna.

Kristo, entzun iezaguzu.

Kristo, adi iezaguzu.

Zeruko Aita Jainkoa. Erruki Jauna.

Gizadiaren Salbatzaile, Seme Jainkoa. Erruki Jauna.

Espiritu Santu Jaikoa. Erruki Jauna.

Hirutasun Santu, Jainko bakarra. Erruki Jauna.

Andre Maria Donea. Otoitz gure alde.

Jainkoaren Ama Donea.

Birjinen Birjina Donea.

Kristoren Ama.

Elizaren Ama.

Jainko graziaren Ama.

Ama guztiz garbia.

Ama lausorik gabea.

Ama eta Birjina.

Ama errugabea.

Ama sortzez garbia.

Ama miragarria.

Erakutsi oneko Ama.

Egilearen Ama.

Salbatzailearen Ama.

Birjina begiratuena.

Birjina agurgarria

Birjina goragarria

Birjina ahaltsua

Birjina errukitsua

Birjina zintzoa

Santutasun eredua

Jakinduariaren aulkia

Gure pozaren iturburua

Espiritu Santuaren jauretxea

Graziarik egintzarik ederrena

Jainkoaganako eskaintzaren eredua

Arrosa aukeratua

Dabiden dorrea

Marfilezko dorrea

Urrezko etxea

Itunaren kutxa

Zeruko atea

Goizeko izarra

Gaixoen osasuna

Bekatarien babesa

Nahigabetuen poza

Kristauen laguntza

Aingeruen Erregina

Patriarken Erregina

Profeten Erregina

Apostoluen Erregina

Martirien Erregina

Aitorlen Erregina

Birjinen Erregina

Santu guztien Erregina

Jatorrizko errurik gabe sortutako Erregina

Zerura jasotako Erregina

Errosario Santuaren Erregina

Sendiaren Erregina

Bakearen Erregina

Jainkoaren Bildotsa, Zuk kentzen duzu munduko bekatua: barka, Jauna.

Jainkoaren Bildotsa, Zuk kentzen duzu munduko bekatua: entzun Jauna.

Jainkoaren Bildotsa, Zuk kentzen duzu munduko bekatua: erruki Jauna.

Otoitz eguzu gure alde Jaungoikoaren Ama Done horrek. Jesukristoren gure Jaunaren aginduak irabaz ditzagun. Amen

Otoitza: Jainko Jauna, emaiguzu zure zerbitzarioi gorputz-arimetako osasuna; eta Maria beti Birjina dohatsua laguntzaile dugula, atera gaitzazu bizitza honetako ilunaldietatik eta eraman, zeruko zorionaren jabe izatera. Jesukristo gure Jaunaren bitartez, Amen.

ADORO TE DEVOTE

Eraspenaz maite zaitut, Jainko ezkutua,

egiazki gordeta hauen irudipean.

Zure aurrean zeharo menperatuta dago nire bihotza,

oso-osorik gurtzen zaitu zu ikustean.

Zutaz epaitzerakoan okertzen dira ikusmena, ukimena, dastamena;

baina zinez sinesteko entzumena da nahikoa;

Jainko Semeak esan duen guztia sinesten dut;

ezer ez da benetako hitz hau baino egiagoa.

Gurutzean jainkotasuna estalia zegoen,

baina hemen gizatasuna ere da ezkutu;

sinesten ditut eta aitortzen biak,

ezer ez da benetako hitz hau baino egiagoa.

Zauriak ez ditut ikusten Tomasek so egin zien bezala,

baina aitortzen dut nire Jainkoa zarela;

egizu zuengan gero eta gehiago sinets dezadan,

Zuregan itxaron, maite zaitzadala.

Oh, Jaunaren heriotzaren oroigarri!

Gizonari bizitza ematen dion Ogia!

Emaiozu nire arimari zutaz bizi dadila,

zure eztitasuna beti dezala dasta.

Jesus Jauna, pelikano ona!

garbi nazazu, ni zikin hau, zeure odolaz,

mundu osoaren hobenak

garbi ditzakeen ttanta-odolaz.

Jesus, orain ezkutua dakusdana,

irrikaz nahi dudana eskatzen dizut bete dadila,

zure aurpegia agerturik begiratzean,

zure aintza ikusiz, zoriontsu izan nadila. Halaxe.

Nafarroa Oinez 2011ko euskarazko meza

Urriaren 16an euskaltzaleek bazuten zita bat Tafallan eta sinestunok izan dugu aukera bat egun seinalatu horretan, euskara ospatzeaz gain, gure fedea ospatzeko; izan ere, aurtengo Nafarroa Oinezen euskarazko Meza ospatu da bertako parrokian, Santa María Elizan. Meza 11:30etan ospatu zen eta meza-emaileak Mikel Garziandia, Xabier Irrigaray eta bertako parrokoa den José Manuel García de Eulate izan ziren.

Nafarroa Oineza doazen milaka euskaltzaleen artean badira kristau sentitzen direnak, noski, eta haientzat aukera bat da egun horretan ere euskarazko Meza izateko. Tafallan izanda, hango elizaren edertasuna eta artea dastatzeko abagune aparta izan zen, gainera.

Aurreko zenbait urtetan ospatu izan da meza euskaraz Nafarroa Oinezen inguruan. Aurtengoa aurreneko aldia da Tafallan egiten dena: hango parrokoa José Manuel bera poliki moldatu zen ebanjelioa euskaraz irakurtzen eta esker oneko agertu zen etorri zirenekin.

Esan izan da euskalgintza azken bolada honetan urrutiratu egin dela kristautasunetik. Hori horrela ez da izango baldin eta kristauok eta, batez ere, laikook errealitate horretan egoten jakiten badugu, bertara gure kristau izaera eramaten badugu, giro horiek Kristoren bakeaz eta poztasunaz kutsatzen baditugu. Egia esan, dagoeneko bagaude errealitate horrekin eguneroko harremanetan. Bakarrik falta zaigu kamuflajeak utzi eta normaltasunez gure kristautasuna nola bizi dugun agertzea, nola gure bizitza argituta dagoen ez ezkutatzea. Agian baten bat animatuko da gure bidea jarraitzera.

Datozen urteetan sendotuko ahal da ekimen hau!

Iran eta emakumeen aurkako harriketak

Ikusi berri dut The Stoning of Soraya (La verdad de Soraya M.). Kazetari franko-iraniarraren La Femme lapidé best-sellerraren adaptazioa da. Filme gogorra, sinesgarria eta oso humanoa. Gomendagarria, hala ere, eta hezigarria. Ez da Hollywood-eko filme tipikoa, komertzial horietakoa, nahiz eta aktore nagusienetako bat amerikarra izan: Jim Caviezel, The Passion filmean Jesusen papera egiten duena. Aktoresak oso onak dira baita.

Benetan gertatutako istorioa da: Irango herrixka batean Soraya izeneko emakume bat, lau seme-alaben ama, pertsona ondratua eta langiletsua, oztopo bat da bere senarrarentzat; izan ere, honek beste emakume batekin ezkondu nahi du, hain andrezalea da eta. Islamaren joera muturreko batez baliatzen da eta bere emazteak adulterioa edo ezkontza-lohitzea egin duelako salaketa egiten du. Bistatik kentzeko trikimailu maltzurra. Horrelako kasuetan, emazteak frogatu behar du errugabea dela. Salaketa emakume batek jarri izan balu, ostera, orduan emakumea da gizona erruduna dela frogatu behar duena. Halakoxea da hango “legea”. Jakina, herrixka horretan, erreza da testigantza faltsuak biltzea emakume xume baten kontra. Eta zigorra garratza da: harrikatua izango da, hil arte.

Esan bezala kasu lazgarri hori gertatu zen. Iranen, eta horrelako beste zenbait lekutan gaur egun ere horrelakoak egiten dira, nahiz eta isilean gordetzen diren, adierazpen askatasuna murriztuta dagoelako han.

Burura etortzen zait gure Aita Santuaren diskurtsoa Alemaniako Parlamentuan. Horretan esaten du kristautasunak sekula ez duela inposatu “errebelatutako” zuzenbide bat; hau da, Elizak ez du esaten ordenamendu juridiko jakin bat dela “goitik” datorrena eta nahi eta nahi ez bete behar dela. Elizak esaten du izaera eta arrazoia direla zuzenbidearen iturriak. Izan ere, Jainkoak gizakioi adimena eman digu eta izaera jakin bat. Haiei jarraiki, zuzentasunez, askatasunez eta besteekiko errespetuz bilatu behar dugu elkarbizitza eta justizia. Hori ez da gertatzen beste zenbait kulturetan. Iranen, esaterako, erlijioa eta politika (erlijioa eta legea, erlijioa eta kodigo penala, erlijioa eta batzuen interesak) nahasten dira. Bertako ordenamendu juridikoa bat eta bakarra da, “errebelatua da”, “goitik” omen dator eta ezin da zalantzan jarri. Eta, beraz, emakumeak harrikatzea, adibidez, guztiz zuzena da: zilegizkoa da.

Tira, ez du bestelako esplikazioen beharrik. Burua sorbalden gainean badaukagu erabili dezagun, horretarako eman baitigu Goikoak, ez xaloak izateko eta horrelako herrialdeetan nahi dutena egiten ahal dutela uste izateko.