Familia ugariek festa giroan hainbat aldarri zabaldu zituzten bilbon eta Donostian

Hauek dira erakundeei eskatzen dizkiegunak, familia edukitzea eta lan egitea, biak ala biak batera posible izatea

14 - VII - 2005

Berria/ El Correo

Familia ugariek bi jai egin zituzten Bilbon eta Donostian. Etxean hiru ume edo gehiago dituzten familiak dira gaur ugariak. Urtero elkartzen dira, sendi arteko jaia egiteko, eta dituzten arazo eta premien inguruan agintariei atentzioa emateko. Hirukide federazioko kide diren Lasterbide eta Liluraldi elkarteko guraso eta seme-alabak Casilda Iturrizar parkean batu ziren Bilbon, eta Anoeta estadioaren inguruetan Donostian.

Goizean goizetik hasi ziren elkartzen familiak festa guneetan. Bilbon zerua lainotsu egon eta zenbait unetan euri apur bat bota bazuen ere, umeek ez zuten aitzakiarik onartu kale egiteko. Arte Eder museoaren alboan hasi eta parkearen beste muturreraino, Euskalduna jauregiaren aurrean, hamaika jarduera antolatu zituzten familia ugari eta txikien gozamenerako. Donostian ere, halatsu.

Goizean, halakoetan ohikoak diren jolas eta tailerrez gain, herri kirolen erakustaldia eta magia ikuskizuna izan ziren. Arratsaldean, olgetarako tartearekin batera, pailazoen agerraldia eta berbena izan zuten elkarturiko sendiek.

Jaia eta aldarrikapena

Antolatzaileek aurretik iragarri bezala, beste ezeren gainetik parte-hartzea bilatu zuten ospakizunekin. Hori bai, festa egitearekin batera, familia ugarien aldarrikapenak ere plazaratu zituzten. Festara joan zirenei azaldu zietenez, asko dira Euskal Herrian hiru seme-alaba edo gehiago dituzten familiak. Arabari, Bizkaiari eta Gipuzkoari dagokionez, 2.500 familia dira Hirukideko kide. Askok arazo handiak dituzte.
Ogasunaren aldetik diru galerak izaten dituztela nabarmendu zuten. Argi utzi zuten; ez dute pribilegiorik nahi, bidezkoak diren eskubideak baino ez. Eta jai giro alaian egin zuten horien alde.

«Erraztasunak behar ditugu familia eta lana uztartzeko»

Ohikoa den baino ume gehiago ikusten ziren atzo Bilboko Casilda Iturrizar parkean. 12:00ak aldera herri kiroletarako txokoa prestatzen ari ziren bitartean, Hirukideko kideak informazio mahaia atontzen zebiltzan. Lanean buru-belarri zebiltzanen artean, Hodei Arrausi zegoen, Hirukide familia ugarien federazioko kidea. Tarte bat hartu zuen beren jardunaz aritzeko.

Festa handiak antolatu dituzue Bilbon eta Donostian. Zer bilatzen duzue era honetako ekimenekin?

Jai hauek helburu bikoitza daukate. Jaia bera batetik. Ospakizun eguna izatea nahi genuke; familientzat, noski, eta batez ere, umeentzat. Eta bestetik errebindikazioak nabarmenduko nituzke. Elkarte moduan badugu premia herritarrei azaltzeko zeintzuk diren familia ugariok Administrazioari eskatzen dizkiogunak.

Zeintzuk dira bada elkartearen eskari horiek?

Elkarte bezala agintariei, erakunde guztietakoei, egiten diegun lehenengo eskaera Familiaren Zuzendaritza sortzea litzateke. Egitura honen zeregina hainbat erakunderen arteko koordinazio lana betetzea litzateke. Ezin dugu ahaztu gaur egun badaudela hainbat ekimen familiei zuzendutakoak erakunde ezberdinetan. Bai Jaurlaritzak, bai foru aldundiek, bai udalek, guztiek egiten dituzte gauzak, eta behar duguna da horiek guztiak koordinatuko dituen egitura bat. Era berean, Familiaren Lege propioa egin dezatela eskatzen diegu. Europako zenbait herrialdetan dagoeneko egin duten araudiaren antzekoa. Horrek familiak dituen beharrizanak ase beharko lituzke. Eta hirugarrenik, garrantzitsua deritzogu familia bizitza eta lana uztartu ahal izateko baliabideak eskaintzeari. Horiek dira erakundeei eskatzen dizkiegunak, familia edukitzea eta lan egitea, biak ala biak batera posible izatea. Horretarako erraztasunak behar ditugu.

Badira bikote asko umea eduki nahi bai, baina ezin izaten dutenak oso garesti ateratzen zaiela esaten dutelako. Benetan hain garestia egiten da umeak izatea?

Bai, zoritxarrez, bada. Duela gutxi elkarteak berak hori ikertzeko eskatu zion Bilboko abokatu talde bati. Zehaztasunez jakin nahi genuen zein den familia ugariak urtean izaten duen gastua. Emaitzak ikusgarriak izan dira. Ondorioztatu zutenaren arabera, urte amaieran oso handia da gastua, batez ere zeharkako zergen ondorioz. Etxebizitza ere arazo da askorentzat. Gero eta txikiagoak, gero eta garestiagoak, zaila da baldintza horiekin familia ugaria izatea.

Familia ugariak, edo familia ugarien mugimenduak, gutxienez, gaur egun talde erlijioso edo politiko zehatzekin lotu izan dira sarritan. Egia al da hori?

Nik Hirukide federazioaren izenean hitz egin dezaket eta, gurean behinik behin, denetik dago. Gure bazkideen artean baditugu familia ugari tradizionalak, jakina; baina baditugu, era berean, guraso bakarreko familiak, baditugu dibortziatu diren bikoteak eta berriro ezkondu direnak, eta antzeko gehiago. Ez Hirukide ez berau osatzen duten elkarteak ez dira egitura erlijiosoak, eta ez dugu loturarik ez Elizarekin ez bestelako taldeekin. Guk familia eredu guztiak errespetatzen ditugu. Azken batean defendatu nahi duguna familia bera delako. Familia bere osotasunean.

Rakel Balencia nazioarteko top modeloaren bataioa

Hogeitabi urteekin bataiatzen naiz, orain konturatzen bainaiz balore katolikoak nireak direla

05 - V - 2005

Diario Vasco, 2005-05-02

Rakel Balencia Miss Gipuzkoa izendatu zuten 2001ean, eta 2003an Nazioarteko Top Model Beiruten. Hori ohiko gertaera da. Baina ez da hain normala, ordea, Rakel, 22 urte bete dituen top model bat, bataiatu berria izatea. Artzain Onaren Katedralean bataiatu zuen Juan Maria Uriarte gotzainak joan den Pazko Igande bezperan.

“Lanbidez modelo naiz, baina nire bizitza pribatuari dagokien gauzetan oso isilkorra. Bataiatzea oso barneko erabakia izan da niretzat, baina azaltzera bultza naute beste batzuentzat lagungarri izan daitekeelako” dio ahots ahulez Donostian Zuzenbidea 4 ikasten duen bitartean Zinbawen edo Estatu Batuetan lan egiten duen metro laurogeiko neska honek.

Eta zergatik orain? “Nire gurasoak katolikoak ziren, baina anaia eta ni jaio ginenean hobe zela itxarotea pentsatu zuten, heldutakoan bataioa hartu edo ez guk aukera genezan. Oso barneko erabakia zela pentsatu zuten eta guk erabaki behar genuela aukeratzeko gauza izatera heltzen ginenean. Gure gurasoen erabaki honek aiton-amonen kexak altxa zituzten, ohizko bataioaren alde baitzeuden”.

Besteengatik arduratuta

Ikastetxe laiko batean ikasketak egin eta erlijio katolikoaren axolarik gabe hazi zen. “17 edo 18 urte nituela beste gazteen ideia nahaspilak nituen nik ere”. Amaren laguntzarekin modelo bezala hasi zen Donostiako Firts Models agentzian, eta gero gora egin zuen. Beiruten lortutako tituluak munduko ateak ireki zizkion. Orain nazio desberdinetan lan egiten du Bartzelonako agentzia baten eskutik. “Pasarelan gozatzen dut, baita bidaietan ere, herriak eta kulturak ezagutuz, bainan moda unibertsoaren barne-legeak ez zaizkit atsegin” .

Eta halako mundu kaskarin batean, nola azaltzen da erlijio kezka? “Beti aldizkatu izan dut lana kezkatzen nauten gaien ikastaroekin. Orain urte batzuk protokolo ikastaro bat egin nuen eta ISSAko (Donostiako Idazkaritza Institutoa) neska batzuk ezagutu nituen eta haien bidez Rafael Hernandez, eskola horretako kapilaua: Garai hartan oso kezkatuta nengoen giza baloreekin, besteekin pertsona ona izatera iritsi nahi nuelako, funtsezkoa iruditzen baitzitzaidan. Don Rafaeli katekesi antzeko bat eman ziezadala eskatu nion, eta azkenean bataiatzea erabaki nuen, argi ikusi bainuen nik baloretzat ditudanak, erlijio katolikoaren baloreak direla.

Bataioa Artzain Onaren katedralean

“Antzina ohitura zen Pazko Igande bezperan helduak bataiatzea, Jesusen Berpiztearen gaua baita” diosku Rakelek. “Eliza beterik zegoen, gure familiez gain, gau berezi hartan mezara joan ziren beste fededunak baitzeuden ere. Bataio normala da, baina haurrak izan beharrean helduak ginenez, jendearen aurrean hitz egin behar izan genuen Jesusen aukera zergatik hartzen genuen azaltzeko. Eta benetan esaten dizut, askoz zailago dela niretzat barneko gauza batez jende aurrean hitz egitea, pasarela batean desfilatzea baino” Aita eta ama pontekoak bere osaba eta izeba izan ziren.

“Jende guztiak ez ditu arrazoi berak izaten bataiatzeko orduan. Ni Jesukristok irakatsi zuenagatik egin naiz katolikoa: onberatasuna, besteei laguntzea, horiek dira nire baloreak. Eta zenbat eta on gehiago besteei egin, bizitzan hobeto dihoakizula uste dut”.

Eta zer pentsatzen dute modaren munduko lagunek zure “onbideratzeaz”? “Egia esan, gehienek egunkari hau irakurriz jakingo dute, nik nire buruaz oso gutxi hitz egiten baitut. Historia hau kontatzea onartu badut, animatu nautelako izan da. Baliteke, nahasita dagoen norbait, nire eboluzioa ezagutuz argia ikustea.

Eta etorkizuna? “Nazioarteko harremanen mundua gustatzen zait. Karrera bukatzean, nahiko nuke gai honi buruz Estatu Batuetan master bat egin, eta gero ikusiko da. Epe laburrean, maiatzean, Sendotza sakramentua hartuko dut.

Eta egunkarietan halako emakume batentzat beharrezkoa den galdera bat: Senargairik? “Nahiago dut niretzat gorde hori. Baina oso pozik bizi naizela esan dezaket…”

Kode deontologiko bat miss eta misterentzat

Rakel Balencia, bataioa ez ezik, beste albiste baten gaia da. Berak idatzi du miss eta mister-entzat egin den lehenengo kode deontologikoa. “Espainian hutsune izugarria dago alor honetan; eta lehen dokumentu bat jarri nahi izan dut mahai gainean. Nahi nuke araudi bat egiteko oinarri izango balitz, lan honetan dabiltzan neskak babesa aurki dezaten”. Zirriborro hau Jesus Albertos irakasleak argitara behar duen liburuan sartuta dago: “Belleza, moda, excelencia. Misses, modelos y expertos hablan de ética”.

“Ez zen gauza erraza izan kode hau idaztea, hutsetik hasten baikinen. Adiskideek lagundu didate, Frantzian dagoen materiala erabili dut eta Zuzenbidean egin ditudan urteak ere balio izan didate”. Miss eta Misterrek prestaera fisikoa izateaz gain, prestaera “morala eta intelektuala” behar dutela aldarrikatzen da liburuan. Eta “kontzientzia klausula” erabili dezaketela ezartzen du, “aukeratuak edo kontratatuak izateko, beren duintasuna urra dezaketen egoera, jarrera edo ekintzak baldintza bezala jarriko balizkiete”.

Taiwanen ere Korpus Kristi-ko prozesioa izan da

Txikienek danborrak, loreak eta jakulatoriekin idatzitako farol txinoak eramaten zituzten, eta poliziak berak bi ertzain motorizatuak jarri zituen

30 - VI - 2005

Aita Esteban Aranaz, orain Aita Esteban Shiou ShenFu, Valladolideko apaiz bat da. Nafarroako Unibertsitatean ikasi ondoren, bere apezpikuari Txinara joateko baimena eskatuz jardun zitzaion zenbait urtez. Orain Taipei-ko akademia batean bi urte daramatza mandarin hizkuntza ikasten. Han Comunión y Liberación-eko beste apaiz italiar bat ezagutu zuen, eta bien artean akademian bertan lan pastorala egiten hasi ziren.

Duela gutxi, Taipei-ko kudeatzaile apostolikoak parrokia bana utzi du beren ardurapean. Aita Aranaz Taipei-ko auzorik dotoreenean dago, Kuriatik oso gertu. Aita Aranaz oso sartuta dago bere zerbitzu berrian. Gainera, hizkuntza-akademian bere pastoraltza lana jarraitzen du, non konbertsio batzuk izan baitira.

Erlijioso baten lagun mina da, Aita Le Gal, eta batzuetan aholkua edota laguntza eskatzen dio. Mandarina oraindik menperatzen ez duenez, Aita Le Gal-i sermoi bat predikatzeko eskatu zion, Sakramentu Guztiz Santuaren gainean hain zuzen, Korpus festaburua prestatzearren.

Horrela kontatzen ditu gertaerak:

“Asiako lurralde honetan Korpus Kristiren jaiak pasa ditugu, orain dela gutxi. Parrokian Mezari buruzko hiru eguneko katekesia antolatu genuen. Lehenik, zazpietan Aitortzak, eta gero, bederatziak arte, katekesia. “Adoro te devote” kantatu genuen eta gero Itun Berriko pasarte bat irakurri: biziaren ogia, azken afaria, nekaldia. Dena, txineraz kantatutako Agur Maria batekin bukatu genuen. Bakoitzak bere Meza liburua, “Mane nobiscum” eta “Redemptionis Sacramentum” dokumentuak ekarri behar zituzten. Hogeita bost fededunek hartu zuten parte; parrokiak ehun eta hogei lagun biltzen ditu.

Larunbatean parrokiko gazte batzuek alfonbra bat prestatu zuten prozesiorako. Arroza eta beste material batzuekin egin genuen, eta elizako sarreran jarri genuen. Igandeko zortzi eta erdietan eduki genuen Meza Santua prozesioarekin. Yanji street, Ren Ai Lu eta Kuan Fu Nan Lu kaleak igaro genituen. Txikienek danborrak, loreak eta jakulatoriekin idatzitako farol txinoak eramaten zituzten. Prozesioa bitan gelditu zen Guztiz Santuaren bedeinkazioa jasotzeko.

Prozesioa kalean egiteko poliziari parte eman behar izan genion, eta poliziak berak bi ertzain motorizatuak jarri zizkiguten. Hau izan da lehenengo prozesioa 50 urte dituen parroki honetan, Taipei hirigunean, munduan eraikin den etxe orratz handienaren aldamenean. Hemen ez dago kristau kultura, eta horregatik da garrantzitsua kristau tradizio patrimonio bat eraikitzea.

Maiatzean, Wanchin-en izan ginen. Hegoaldean dago eta Taiwanen eraikitako lehen eliza da, orain dela 150 urte. Ama Birjina Sortzez garbiari eraikia da eta dominikoek eramaten dute. Bertan moja dominikarren monasterio bat ere badago. Meza ondoren Guztiz Santuarekin Erakustaldi bat eduki genuen. Gero, Juan Pablo IIgarrenak bedeinkatutako Ama Birjinari errezatu genuen. Monasterioko lokutorioara ere pasa ginen eta moja komunitatearekin egon ginen. Jendea oso ukituta bueltatu zen.

Trinitatearen igandean sei gazte konfirmatu ziren. Mons. Cheng Artzapezpikuak konfirmatu zituen. Bestetik, katekumenu talde bat daukagu katekesian. Igandetan Mezetara etortzen dira nahiz eta oraindik bataiatuak ez izan. Komunioa iristen denean, apaizak bedeinkazioa ematen die.”

© 2005, Opus Deiko informazio bulegoa Interneten

EUKARISTIAREN URTEA

Bedeinka zaitzatela zeruko eguzkiak, eta izarrek; lurreko loreek, belarrek, eta itsasoko arraiek. Bedeinka zaitzatela lurrean bizi diren arima on guziek

Juan Bautista Agirre (1742-1823) Asteasungo erretorearen otoitz bildumaren zati bat eskaintzen dugu.

Jesus Gurutziltzatuari
Jesusen Arima, bertutez bete nazazu.Jesusen Bihotza, amorez erre nazazu.Jesusen Gorputza, salba nazazu.Jesusen Odola, Zeruko amodioz zora nazazu.Jesusen Bihotzeko Ura, garbi nazazu.Jesusen Izerdia, Graziaren bizitzaz bete nazazu.Jesusen Pasioa, indartsu egin nazazu.O Jesus ona, adi nazazu.Zure Llagen artean gorde nazazu.Zugandik alde egiten ez arren utzi.Etsai galgarriagandik gorde nazazu.Nire heriotzako orduan dei nazazu.Zeuregana eraman nazazu.Zeure aldean ipini nazazu,zure Santu eta Aingeruekin alaba zaitzadan sekula guzian. Amen.


Miretsi zaitez zugana era honetan Jaun handia etortzeaz
Nondik, nire arima, nondik zuri honenbeste ondasun eta mesede? Harriturik geratu zen Salomon, zeren berak egin zuen Eliz ederrean bizitzera Jauna etorri baitzitzaion. Harriturik geratu zen Santa Isabel, zeren ikustera edo bisitatzera joan baitzitzaion Jainkoaren Ama. Harritzen da Eliz Ama Santa, zeren Trinitateko bigarren Pertsona gizon egin eta bizitu baitzen Birjina txit Santaren sabelean. Nire arima, eta Jaun Handi hura bera zugana etorri bada, eta zeurekin badaukazu, ez zara miretsiko? Jesus ona! Zer da gizona, eta zer naiz ni, Zu era honetan nitaz oroitzeko?

Egizu Fede, Esperantza eta Karitatezko afektuak, eta adora ezazu
O Jesus ona, nire arimaren Erosle edo Erredentore maitagarria! Sinisten dut Zu egiaz aurkitzen zarela Aldareko Sakramentuan, eta Sakramentu honetan nigana etorri zarela. Sinisten dut Zu ongi hartzen zaituenari ematen diozula Zeruko Grazia eta ongi bizitzeko laguntzak; eta gainera agintzen diozula betiko bizitza. Eta beragatik, Zugan ipintzen dut nire uste guzia, zeren Zu baitzara Jaungoiko Guztiahaldun, edo guzia dezakezuna, eta zeure hitzetan guztiz Leiala.
O Ontasun guztiz miragarria! Amatzen zaitut bihotz guzitik, eta zure izenean amatzen ditut nire lagun hurko guziak, eta horien artean nire etsaiak. Adoratzen zaitut nire Jaungoikoa, nire Erregea, nire Salbatzailea.

Eman iezazkiozu eskerrak
Nahi nuke nik, nire Jesus ona, egin dizkidazun mesede guziei, eta orain nigana etortzean egin didazun honi, ahalik ongiena erantzutea; baina aitortzen dut ez naizela gauza, eta gai honetarako ez ezik mila bider gutxiagorako ere. Gehiena nik egin dezakedana da, esker umilak ematea. Mila esker bada, nire Ongile handia. Alaba eta bedeinka zaitzatela Zeruan eta lurrean diren gauza guziek. Bedeinka zaitzatela zeruko eguzkiak, eta izarrek; lurreko loreek, belarrek, eta itsasoko arraiek. Bedeinka zaitzatela lurrean bizi diren arima on guziek. Bedeinka zaitzatela zeruko kerubin jakintsuek, Serafin Jaunaren amorez irazekiek, eta Aingeru dohatsu guziek. Bedeinka zaitzala zure Ama maitagarri Aingeruen eta Santu guzien Erreginak.

Egin iezazkiozu zure eskari edo erregu umilak
Zer uste ez dezaket gaur Zugandik, nire Salbatzailea? Etxe batean sartzen badira lurreko erregeak, ez ohi dira handik irten etxekoei mesederen batzuk egin gabe. Eta izanik Zu errege guzien Erregea, zer ez du Zugandik uste izan behar nire arima behartsu honek? Bera den guzia eman duenak zer ukatu dezake? Egidazu bada, nire Jesus ona, hemendik aurrera bekatutik aldegiteko eta Grazian irauteko dohaina. Egidazu nire grina txarrak, batez ere harako gehiena nekatzen nauen hura, hezteko eta garaitzeko zure laguntza ugaria.

Oroi zaitez nire ahaide eta ongileez, baita nire etsaiez ere, hala biziez, nola hilez. Gorde ezazu zure Eliza Santa bere etsai guzietatik, baita gure jaun erregea ere, bere etxeko guziekin.

Juan Bautista Agirre (1742-1823)
Juan Bautista Agirre, gipuzkerazko idazle zaharretan gorena da askoren ustez. Asteasun jaio zen 1742an eta bertan hil 1823an, erretore zela. Hortik aurrera ez dakigu askorik haren bizitzaz. Bizimodu xumea izango zuela pentsa liteke, jaioterrian apaiz eta bertatik ia atera gabe, baina haren liburuek jakintza zabala, adimen argia eta irudimen joria erakusten digute. Landu zituen gaietan ere ez da urruntzen garaiko beste idazleengandik: jaunartzea, aitortza, sakramentu eta aginduak... Erakusaldiak izena eman zien bere liburuei, zati bakoitza gai baten inguruko ikasgaia bailitzan.
Obrak:- Confesioco eta Comunioco Sacramentuen gañean eracusaldiac - Jesu-Cristoc bere elizari utzi ciozcan, zazpi sacramentuen gañean eracusaldia- Jaungoicoaren legueco amar aguinteen gañean eracusaldiac- Jesu-Cristo eta Virgiña chit santaren misterioen, eta beste cembait gaucen gañean eracusaldiac

"Euskal literaturaren antologia"X. Mendiguren / K. IzagirreElkar, 1998

GERARDO CASTILLO IRAKASLEAREN LIBURU BERRIA

Ezkontza, berrogeita hamar urte dirauen elkarrizketa da. Telesail asko eta asko dibortzioaren ingurukoak dira. Gazteek sinisten dute maitasun zoriontsuak amaitu direla
El Correo, 2005-V-19
Herrialde ezberdinetako ehun senar-emazte "zoriontsuei" galdetuz gero liburu bat argitaratu du, ezkontideen maitasunaren arrakastarako bideak iragartzeko. Castillo idazleak 'La camisa del casado feliz. El secreto de los matrimonios que funcionan' aurkeztu zuen atzo, Bilboko Umedi ikastetxean.
-Zuk esango duzu zeintzuk diren bide horiek!-Hona, bide bat: ezkondu, betiko eginbeharra da! Asmo horrekin hasiera-hasieratik...

-Bizitza osorako ezkontzen gara, bai, baina batzuetan ez da betiko izaten.-Jarrera da garrantzizkoa. Ez da berdin ezkondu, zer gertatzen den ikusi eta pentsatu: 'Ez badoakit ondo, alde eta kitto' Ez! Konpromisozko maitasunetik jo behar dugu!
-Litekeena al da, ezkontzari, konfidantza gehiegi diogula?-Askok balioesten dute maitasun egonkor eta leiala, baina gero eta gehiago dira gazte beldurrez beteak.
-Zeri beldur?-Maitasunak iraun ez egiteari, elkarbizitzaz nekatzera iristeari, ezkontzan porrot egiteari...
-Ezkongaialdi on batek asko laguntzen al du?-Funtsezkoa da! Bestearengan ustea izateak, beldurrik gabe arriskatzeak... lagundu egiten du dena ondo joateko.
-Edo kolpe ikaragarria hartzeko.-Inoiz ezin da ziurtatu, ezkontzea, denei ondo aterako zaienik.
-Dibortzioak, gero eta ugariagoak dira.-Kezkagarria da. Telesail asko eta asko ezkontzako desleialtasunaren eta dibortzioaren ingurukoak dira. Gazteek, azkenean, sinistu egiten dute maitasun leialak eta senar-emazte zoriontsuak amaitu direla.
-Ezkontza ondo ez badoa, onena, nor bere aldetik joatea da.-Konponbideak jar ditzagun lehenago! Ezkontzea norberaren burua ematea da, bestearen eskuetan norberaren burua uztea...
-Arazoak sumatzean, kokoteraino al dago jendea?-Jasan egiteko gaitasuna galtzen ari da. Ezkontzaren arerio handi-handia, norberekeria da.
-Elkarbizitzak erre egiten du.-Bai, eta asko ere!
-Beti aurpegi bera ikustea...-Horregatik begiratu behar da bestea, egunero, begi on berriekin. Maitasuna ez da ezkontzaren egunean eraikitzen. Egunero ezkondu behar da!

Bestearentzat bizi
- Maitasuna, etenik gabeko konkista al da?-Zailena ez da lehen konkista. Mantendu egin behar da detaileekin! Bestearentzat bizi behar da, sorgarritasuna maitasunean garatu, landareari egunero bota behar zaio ura...Bestela, lehortu egiten da! Nik, 'Gure artean gaizki joan zen. Zoritxarra izan genuen' entzuten dudanean, kontuz, unetxo bat, mesedez!
-Ezkontza, loteria bat al da?-Egongo da esaten duenik: 'Zori ona izan nuen emakume zoragarri hau bilatzean'. Zoria, irabazi egin behar da. Porrot egiten duten bikoteei, hau esango nieke: 'Garaiz hitz egin zenuten?'
-Isiltasunak hil egiten du?-Ikasi egin behar da ezberdintasunean bizi izaten eta, bestea, den bezala onartzen. Ezkontide batek bestea moldatu nahi badu, porrot egingo du. Eta, ze arraio, adierazi dezagun sarriago maitasuna! Senarroi kosta egiten zaigu 'Maite zaitut' esatea.

-Hezkuntzaren arazoa.-Eta emakumea horren zain dago. Senarrak esaten ohi dio: 'Zertarako galdetzen didazu, direla 40 urte esan banizun?'. Baina emazteek ez dute galdetzen maite dituzun jakiteko. Hori aditzean, berriro maitatuak sentitzeagatik galdetzen dute. Garaiz hitz egin behar da. Bestela, globoa puztuz joango da eta, azkenean, leher egiten du. Egunero hitz egin! Ezkontza, 50 urte dirauen elkarrizketa da. Baina, elkarrizketa ez da 'bakarrizketan' jardutea. Aditzen jakitea da eta, horretarako, begietara ikusi behar da bestea, denbora galtzen jakin behar da... Gozatzea biok batera!
-Nola egin maitasunak bizirik iraun dezan urterik urte?-Miresteko arrazoi berriak bilatzen. Beste ezkontidea, inoiz agortu ezin dugun misterio bat da! Eten gabeko aurkikuntza da. Mirespenak handitu egiten du maitasuna.
-Irritsak maitasunari lekua uzten dionean... zer egin daiteke?-Irritsa murriztu egiten da, baina ez da maitasunaren funtsezko elementua.
-Zein da orduan?-Maitasuna, maitatu nahi izatea da. Nire zoriontasuna, nire emaztearena ere bada. Edo biok zoriontsu edo inor ere ez. Horra, ezkontzaren arau nagusia.
-Zer egin krisialdiak sumatzean direnean?-Erronka bat bezala hartu, eta ez 'pilatzen gaituen harlosa' bezala. Okerrak aitortu behar dira, eta amore ematen jakin behar da.
-Harrokeriak menperatzen gaitu?-Harrokeria ezerezten ez baduzu, ezinezkoa da elkarbizitza!. Krisialdiek irmotu egiten dute maitasuna. Bestea, dituen akatsekin onartu behar da, ez nahiz eta dituen akatsak.
-Eta desleialtasun baterainoko akatsak badira?-Kontuz! Desleialtasuna ez da akats moduko bat. Injustizia bat da.
-Zure emazteari barkatuko zenioke?-Egin beharko nuke behin bakarrik izango balitz eta zuzentzeko asmoa balu, baina ez dakit ahal izango nukeen!
-Parrandatxo bat egin...?-Parrandatxo horiek? Ezkontidearekin berarekin! Kanpoan, itzulerarik gabeko bidea izan daitezke. Eta, arazoak, egunean konpondu behar dira, haserretuta ohoretu ez egiteko. Garrantzizkoa da, egunean bertan, parkamena eskatzea eta parkatzea.
-Ohea, diban modukoa ere izan daiteke? -Sexualitatea, eskaintzeko amodioan kokatu behar da.
-Baina funtsezkoa da.-Norberaren instintua asetzeko adierazbidea bakarrik bada... Atsegina ez da, berez, zoriontasunerako bidea. Umore ona izatea, ordea, ezin hobea da. Ezkontideen arteko komunikazioa errazteko oso bitarte egokia.