Donostiako Gotzainaren berbetan, kooperatiba "eliz eta gizarte konpromisoa uztartzeko modu zilegi eta bikaina izan zen"

MONDRAGON TALDE KOOPERATIBOAREN SORTZAILEEK AITA SANTUAK EMANDAKO SAN SILVESTRE ORDENAREN SARIA JASO ZUTEN

El Diario Vasco

Mondragon Talde Kooperatiboaren sortzaileek San Silvestre Ordenaren sari edo bereizgarria jaso zuten ekainean, Joan Paulo II Aita Santuak hil baino lehentxeago emanik, Elizaren Gizarte Doktrina enpresara aplikatu izanagatik. Lehen aldiz jaso dute bereizgarri hau euskal katoliko batzuek lanaren eremuan garatutako jardueragatik, eta beraz, alor askotako pertsonalitateak bildu ziren ekitaldira. Zirraraz eta esker onez beterik, Alfonso Gorroñogoitiak jardun zuen saridunen bozeramaile, eta ekitaldia "solemne eta maitagarritzat" jo zuen. Omenaldia MCCko langileei helarazi nahian, honako aipamen hau erabili zuen, hain miresten duen Arizmendiarretarengandik hartua: "Golardoak guri ematen zaizkigu, geure kontuan jarri baitira ofizialki beste askoren merezimenduak. Haiek gure aurretik joan dira baina modu ezezagunean bizi".

Pontifizeak emaniko zilarrezko dominak inposatu baino lehen, Meza bat ospatu zen Arantzazun, Donostiako Gotzaina Juan María Uriarte eta José María Setién Gotzain ohia buru zirela. Hona hemen bertaratuen artean zenbait izen ezagun: Juan Jose Ibarretxe Lehendakaria, Gipuzkoako eta Arabako Ahaldun Nagusiak Joxe Joan González de Txabarri eta Ramón Rabanera; Paulino Luesma Espainiako Gobernuaren Ordezkaria; José Antonio Ardanza Lehendakari ohia; Juan María Atutxa, Euskal Legebiltzarreko Presidente ohia; Miguel Buen buruzagi sozialista eta Oñati eta Arrasateko alkateak. Kristau gizartea Donostiako Gotzainaren berbetan, kooperatiba talde honen sorrera "eliz eta gizarte konpromisoa uztartzeko modu zilegi eta bikaina izan zen". Uriartek esan bezala, MCCko bultzatzaileek kristau gizarte pentsamendua enpresa eredu batean hezurmamitu zuten, kapitalismo gordinetik zein gizakiaren kontrako kolektibismotik urrun, eta baita ere duela 50 urte abiaturiko bidea pizgarri eta akuilu izan behar dutela espiritu hori bera gaur eguneko ekonomi, gizarte, lan, kultur eta erlijio egoera eta baldintzei egokitzeko. Lau arrosek aldare oinetan jarrita omendutakoak ordezkatu nahian, erreminta kaxa batek, piztutako argizagi batek eta zatitutako ogi batek alegorikoki adierazi zuten, Gotzainaren esanetan, "lana, fedea eta Fedeak gauzatzen duen eraldatzea. Saridunek eginiko lana ogi bihurtu da, zuzen eta solidarioki banatuta". Mezaren ondoan, Gandiaga Topagunera iritsi eta gero, Uriarte Gotzainak ohartarazi zien bertaratuei Aita Santuak emaniko Bereizgarri hau erabat ohiz kanpokoa dela, baina Pontifizearen iritziz gipuzkoar kooperatibismoaren bultzatzaileek zinez eta modu berezian lagundu dutela Eliza eta mezu katolikoa sustatzeko". Uriartek nabarmendu zuenez, MMCren filosofiak langilea produkzio sistemaren erdigunean kokatzen duela, formazio integrala lortzen saiatzen dena eta jokaera solidarioak sustatzen dituena. Ricardo Aristondok, Batzorde Postulatzailearen ordezkariaren berbetan, "aitorpen honek luzaz gainditzen du ideia hau bultzatu genuenon asmo apalagoa" eta goraipatu zituen omendutakoak, "enpresan ere utopia izan daitekeela sinetsi baitzuten". J.M. Arizmendiarreta Javier Retegik, Eusko Ikaskuntzaren presidenteak saridunen bizitzen gorabehera eta ibilerak edertu zituen. Ondorenean, Alfonso Gorroñogoitiak eskerroneko hitzaldia eman zuen. "Merezi zuen zerbait egin nahi genuen gizonak ginen gu, bakar bakarrik. Hau egiteko bidea apaiz batek erakutsi zigun: fedeak, itxaropenak eta karitateak argitutako apaiz bat, alegia". Gorroñagoitiak esan bezala, "zalantzarik ez, oraindik nabaritzen dugu eguneroko jardunean zeinen adore eta bultzada ematen duen pertsonen elkartasunak, auzolanean egindako lanak eta hala sortutako aberastasuna banatzeko modu zuzenak. Aienatzen ari dira ezaugarri horiek, bai, eta norbaitzuek pentsa dezakete gaur egun, desagertu ere, desagertu egin direla. Hor daude baina, zimentarri iraunkor gisa".