Umeei ez zaie heriotza ezkutatu behar eta parte hartu behar dute errituetan

PATXI IZAGIRRE PSIKOLOGOA EHUREN UDAKO IKASTAROETAN JARDUN DA HEZKUNTZAN HERIOTZARI EMATEN ZAION DENBORA LABURRA DELA-ETA KEZKATUA DAGO

Diario Vasco "Garrantzitsua da umeek parte hartzea heriotzaren inguruko errituetan, nahi badute behintzat. Umeei ez zaie heriotza ezkutatu behar, ezkutatuz gero geure beldurrak pasatzen dizkiegu eta bere errekurtso edo baliabideak atrofiatzen", esan zuen atzo Patxi Izagirre psikologoak, EHUko Udako Ikastaroetan. Heriotzaren psikopedagogia du izenburu berak zuzenduko duen ikastaroak. "Zergatik ezkutatzen dugu heriotza? Zergatik ezkutatzen diegu haurrei batez ere? Zergatik bihurtu dugu tabu, garai batean sexua zen bezala? -esan du Izagirrek-. Hezkuntzan heriotzari eskaintzen zaion denbora laburrak oso kezkaturik nauka. Jabetu behar gara heriotzaren aldetik hutsune handia dugula, bai gizartean bai hezkuntza sisteman".

Patxi Izagirreri behin baino gehiagotan deitu izan diote ikastetxeetatik, batez ere heriotza mingarriren bat gertatu denean. Orain denbora asko ez dela, Seaska, Iparraldeko ikastolen elkarteak deituta, hango ikastetxe batean izan zen. "Bi anaia ziren han. Haietako bat hil berria zen, gaixotasun neurologiko baten ondorioz, eta ikasleek bazekiten beste anaia ere hilko zela, hiltzear zegoela gainera. Horrelakoetan, umeek nahi dute, hasteko, emozionalki ulertuak sentitzea". 0 eta 2 urte bitarteko umeen kasuetan, Izagirreren ustez, "ez--hitzezko komunikazioa oso inportantea da; horrelako ume batek galtzen badu gurasoa, inportanteena ez da zer esaten diozun, baizik eta segurtasuna transmititzea, eta horrelako kasuetan ukimena gehiago landu behar genuke". 2 eta 7 urte bitarteko umeen kasuetan jolasa eta psikomotrizitatea garrantzitsuak omen dira: "Orain denbora asko ez dela, Lantziegoko andereñoak hil zirenean deitu zidaten eta esan nien psikomotrizitate gelan landu behar zutela gaia, haurrek emozioak azaldu zitzaten". Errudun-sentimenduak 7 eta 11 urte bitarteko haurrei dagokienez, "komeni da parte har dezatela errituetan; bestela, errudun-sentimenduak susper daitezke". "Heriotzaren inguruko errituei bultzada handia eman behar zaie gurean", jarraitu du Izagirrek. "Gure kulturan heriotzari tokia emateko garaia heldu da. Badakigu 'primitibo' jotzen diren beste hainbat kulturatan egiten dutela eta horrek laguntza espirituala ematen diela (norberak emango dio edukia espiritual hitzari). Heriotzari zentzua emango dion kultur ondarea garatu edo berreskuratu beharra daukagu".