Mezatara, zer dela eta? (VIII)

— Pasa naiteke, On Bixente?
— Aurrera, Maialen.
— Ah, okupatuta dagoela ikusten dut. Meza bat enkargatu nahi nion... baina geroago etorriko naiz.
— Konforme, Maialen.
— Aizu, On Bixente, Mezak “enkargatu” egiten dira?
— Egiten dena da apaizari enkargatzea intentzio baten alde esan dezan.
— Ba, nik ekainerako bat enkargatu nahi diot; izan ere...
— Hobeto estudiatzeko, ez? Egin behar dena da estudiatzea. Badakizu, “Jaungoikoari erreguz eta lanari mailuz”.
— Tira. Portzierto, zalantza bat daukat. Lehen gurtza edo kultua ematearena aipatu du berorrek. Apaizak gurtza ematen badu, zertarako joan behar naiz ni?
— Zeuk ere gurtza eman dezazun. Meza bakoitzean Eliza modu mistikoan presente egiten den arren, kontua da zuk ere sakrifizio horrekin bat egitea. Apaiza ezinbestekoa da, jakina, apaizik gabe ez dago Mezarik, ez dago “gurtza objetiboa” deritzonik. Baina, behin Kristo agertu eta Jainko Aitari eskaintzen denetik –apaizaren bitartez-, zu ere Kristoren bidez Jainko Aitari eskaintzen ahal zatzaizkio.
— Nola da hori?
— Ez al duzu entzun zer den Mezan parte hartzea?
— Bai, nire lagun batek bere parrokiako koruan kantatzen du, Josetxo, eta nire anaia txikia mezalaguna da hemen.
— Bai, badakit. Baina kontua ez da hori. Kanpo-parte hartzea garrantzitsua da, baina hori baino garrantzitsuagoa barne-parte hartzea da. Norbera Mezatara badoa eta era pasiboan badago atarramendu gutxi aterako du. Elizako aulkiak ere hor daude, eta uste al duzu parte hartzen dutela? Eta zenbat Mezetan egon dira gero! Bakar batean ere ez dute hutsik egiten. Izan ere, parte hartzea da espirituz hor egotea. Jakina, lehenengo gauza da Mezatan egotea, baina behin egonda...
— Hori, hori, ni mezatara joaten banaiz.... zer egin behar dut?
— Agian pentsatzen ari zara esku hartu behar dela zerbait irakurtzen, zerbait eramaten, “antzezten” edo kanta berezi bat kantatzen. Ba ez, zerorren aulkitik erabateko parte hartzea izan dezakezu eta esango dizut nola. Baina ezer baino lehen grazian egon behar da, badakizu zergatik?
— Beti grazian egon behar delako.
— Halaxe da; izan ere, Jaungoikoari gurtza emateko hau oinarrizkoa da. Bestenaz, bizikletaz kilometro mordoa egin baina bizikleta estatiko batean egitea bezalakoa da. Ez du lurra ukitzen, eta, beraz, ez da bere lekutik mugitzen. “Goiko” bizitza ukitzeko eta berorretan aurreratzeko grazian egon behar da.